Gipuzkoako Elikagaien Bankuan 1.300 poltsa jaso ditugu, Donostia Zinemaldiko alfonbra gorriarekin eginak
Gaur partekatzen dugun albisteak erabateko inpaktua du gure xedearekin, markaren balioekin eta lurraldean uzten dugun aztarnarekin.
Izan ere, Gipuzkoako Elikagaien Bankuan 1.300 poltsa jaso ditugu, %100 birziklatuak eta birziklagarriak, jasangarritasuna, gizarteratzea eta elkartasuna batzen dituen ekimen bati esker.
Gipuzkoako Foru Aldundiko Jasangarritasun Departamentuaren, Donostia Zinemaldiaren, Emaus Gizarte Fundazioaren eta SpanSet enpresaren arteko lankidetzari esker izan da posible ekintza hori.
Donostia Zinemaldian joan den irailean alfonbra gorri gisa erabilitako 1.840 m² moketa aprobetxatuta fabrikatu dira poltsa horiek. Material hori orain arte ez zen berrerabiltzen, eta, ekimen honi esker, bigarren bizitza bat eman zaio. Horretaz gainera, lotzeko zinta berrerabiliekin fabrikatu dira poltsen heldulekuak. Jasangarritasunarekin konprometitutako SpanSet enpresak eman ditu zinta horiek.
Poltsak ekoizteari esker, hondakinak murriztu eta ekonomia zirkularra sustatzeaz gainera, inpaktu positiboa lortu da gizarteratzearen alorrean ere. Poltsak Emaus Gizarte Fundazioaren gizarteratzeko eta laneratzeko tailerretan egin dira, eta 345 enplegu-ordu sortu dira egoera kalteberan dauden pertsonentzat.
Urrats bat gehiago, pobreziaren eta produktuak xahutzearen aurkako borrokan
Ekimen honen bitartez, Gipuzkoako Elikagaien Bankuak beste bultzada bat eman dio jasangarritasunarekin eta pobreziaren aurkako borrokarekin harturiko konpromisoari. Baliabideak aprobetxatzen eta 276 kg hondakin sortzea saihesten lagundu du, eta, horretaz gainera, ekintza horrek indartu egiten du erakunde publikoen eta pribatuen arteko lankidetzaren garrantzia, gizartean benetako inpaktua lortzeko.
Poltsak banatzeko ekitaldian parte hartu zuten José Ignacio Asensio Jasangarritasuneko foru-diputatuak, Jose Luis Rebordinos Donostia Zinemaldiko zuzendariak, Aitziber Zubillaga Emaus Gizarte Fundazioko zuzendari nagusiak eta Belén Mendez de Vigo presidenteak.
Azken horrek bereziki nabarmendu zuen horrelako lankidetzen garrantzia: “Poltsa horiek ederki erakusten dute funtsezkoa dela aliantzak egitea pobreziaren eta ingurumena hondatzearen aurka borrokatzeko, ezinbestekoa dela lankidetzan aritzea eta ahaleginak batzea”.
Jasangarritasun-eredu bat etorkizunerako
Lankidetza horri esker, Donostia Zinemaldiko alfonbra gorriko moketak —% 100 birziklatutako poliester birziklagarriz fabrikatua— amaitu egin du bizi-zikloa, eta baliabide erabilgarri bihurtu da berriro. Proiektu honek agerian uzten du materialak berriro aprobetxatzeko berrikuntzak inpaktu positiboa izan dezakeela ingurumenean eta gizartean.
Gipuzkoako Elikagaien Bankuan berretsi egiten dugu eredu bidezkoago, solidarioago eta jasangarri batekin dugun konpromisoa, kontuan izanik ekintza guzti-guztiek balio dutela denontzako etorkizun hobea eraikitzeko eginahalean.